Lirieke - SONG; Gemileo

GEMILEO

Vir Bev

min ken jou met ‘n camel tussen die vingers 
jy, geskuilde kunstenaar                           

met ‘n regisseursraam-bril
gevul met onverpoosde passie
omring deur siele van assosiasie

jou aardse oë het die vermoë om die slimste te kul      

min weet jou pa hy was nie ‘n griek nie 
hoewel jy superstisie soos gips-borde breek

jy glo in liefde en die kosmos
jou verwysing strek verder as grense

jy weet daar is meer 
tot die lewe as net ‘n sondag preek

min hoor snags jou gebede 
jy vra dat die heelal jou sal spaar om te vergeet 

want jy weet 
die lewe het jou iets geleer                     

die lewe het jou vasgehou
deur swaar en deur seer              
                                                

min weet jy droom van digters 
jy het al self na die gawe van klein tyd af verlang

soos Ingrid Jonker en Breyten Breytenbach

ja, jy die sonvanger 
wat in die kombuisvenster hang

min weet jy het liefgeraak vir die reën 
jy glo in die wolke wat oor die see donderweer

deur moederaarde se voorvaders gestuur
om jou siel en jou tuin en jou huis te seen

jou wereld sal bly vergroot hoe meer jou hart gee

©2015 / J. J Brits